Psa 6 | MNA | STEP | Mboe ki Dabit O Yooba, yaamba yo raama ketem malmal pepe. Mi sombe pazal yo, na kam raama lelem bayouŋana pepe.

aMbo 38:1

bMbo 30:9, 88:10+

Psalms 6

Mboe 6

Suŋŋana ki tomtom ta mete biibi ikami

Mboe ki Dabit

1 O Yooba, yaamba yo raama ketem malmal pepe.
Mi sombe pazal yo, na kam raama lelem bayouŋana pepe. ^a
2 Yooba, nio mbesooŋo ku tau. Tana muŋai yo mi iurpe yo lak!
Pa mburoŋ izzu, mi tiroŋ imukurkur lup.
3 Mi iŋgi motoŋana biibi ikam yo ma aŋsaana kat.
Yooba, zem yo pepe. Ŋiizi na mar uulu yo?

4 Yooba, motom miili pio mi uulu yo.
Pa nu toto sua ku mbukŋana, mi urur lelem pa wal ku. Tana muŋai yo mi tatke yo pa meeteŋana.
5 Pa wal meeteŋan ta timbot sula Andewa na, tirao be matan iŋgalu mini som.
Re. Kizin tasa ipakurkuru? Som. ^b
6 Nio aŋkaraŋeeze mete. Tabe ikam yo ma mburoŋ imap.
Mbeŋ ta boozomen na, motoŋ luluunu ipawizis muriŋ.
Kiliigi tio ibot pa motoŋ luluunu.
7 Pataŋana ta ise tio i, koŋ koi bizin menmeen zin biibi pa.
Tana aŋtaŋ biibi kat, mi motoŋ izarzar ma aŋre kat lele som.

8 Niom wal ta konoknok sanaana kamŋana na, koko molo pio!
Pa tiŋiizi tio, Yooba ileŋ kek.
9 Nio aŋtaŋroro i be imuŋai yo, mi ni ileŋ yo kek.
Ni iŋgun talŋaana pa suŋŋana tio. Mi ni ko iuulu yo.
10 Ni ko ipamiaŋ koŋ koi bizin, mi ikam zin ma tiru zalan.
Ko titoombo ma som, to karau men mi timiili ma tila raama kan miaŋ biibi.